Астанада балаларын фильмге түсірмекші болған ана алаяқтың құрбаны болды, деп хабарлайды kaskelen.kz тілшісі Polisia.kz порталына сілтеме жасап.
Қала тұрғыны полицияға арызданып белгісіз адамның тарапынан алаяқтық әрекеттердің құрбаны болғанын және ақшасынан айырылғанын айтты. Тергеу барысында әйел WhatsApp мессенджерінің чатынан ер адам белгілі бір сомаға телехикаяда роль ұсынғаны туралы хабарландыруын көрген.
Оның уәделеріне қызыққан әйел 600 мың теңге жіберіп, балалары кинода роль алады деп үміттенген. Бірақ күдіктінің уәделері екі айға созылып, осы уақыт ішінде ол түрлі сылтау айтқан.
Телехикая ролінде ойнауды күтіп жалыққан әйел полицияға жүгінді.
“Жедел-іздестіру іс-шараларын жүргізу нәтижесінде Байқоңыр ауданы ПБ криминалдық полиция қызметкерлері қаланың 22 жастағы тұрғынын анықтады. Оның елорда аумағында жасалған алаяқтықтың үш эпизодына қатысы бар екені анықталған. Қазіргі уақытта оның басқа да осыған ұқсас қылмыстарға қатысы бар-жоғы тексеріліп жатыр”, – делінген полиция хабарында.
Аталған фактіге қатысты Қылмыстық кодекстің 190-бабы (Алаяқтық) бойынша сотқа дейінгі тергеу амалдары жүргізіліп жатыр. Ол өз ісін мойындағаны айтылады.
