БҰҰ баспасөз хатшысының орынбасары Стефани Тремблей Израиль мен Хамас арасындағы үш айдан астам соғыс салдарынан Газа секторының өмір сүруге келмейтін жағдайға жеткенін айтты, деп хабарлайды kaskelen.kz тілшісі Euronews арнасына сілтеме жасап.
Бас хатшының гуманитарлық мәселелер жөніндегі орынбасары Мартин Гриффитс те үш ай жан түршігерлік шабуылдардандан кейін Газа секторы өлім мекеніне айналғанын айтқан.
Хамас ұйымының Денсаулық сақтау министрлігі мұнда індеттің таралу қаупі бар екенін, бұл алда көп шығынға әкелетінін мәлімдеді.
Ал Ливан БҰҰ Қауіпсіздік кеңесіне шағым түсіріп, Израильді сейсенбі күні ХАМАС жетекшісі Салех әл-Арури мен тағы алты адам қаза тапқан Бейрутке шабуылы үшін айыптады. Израиль бұл шабуылды палестиналық радикалды топқа қарсы “хирургиялық соққы” деп атады.
Сенбі күні таңертең ливандық “Хезболла” тобы жауап ретінде Израильдің солтүстігінде, Мерон тауы аймағында бірнеше ондаған зымыран ұшырды.
Зардап шеккендер туралы ақпарат жоқ. Өз кезегінде, Израиль қорғаныс күштері Ливанның оңтүстігіндегі зымырандардың ұшырылуына жауапты “террорлық ұяшыққа” соққы бергенін айтты.
