Қазақстандық отбасылық психолог, психотерапевт Серікгүл Сәли мектептегі буллинг, қысымды тоқтатудың жолдарын атады, деп хабарлайды kaskelen.kz порталы.
– Жақында сынып жетекшілерінің жалақысын көтеру керек деген мәселе қозғалды және бұл іске асуға жақын тұр. Парламентте осындай сөз қозғалды, бұл Оқу-ағарту министрлігі тарапынан іске асқалы жатыр. Егер сынып жетекшілерінің жалақысы көтерілетін болса, әрбір ұстаз сынып жетекшісі болуға таласса, ұстаздың ұстазы сынып жетекшісі болады. Ол шынымен баланың екінші анасы немесе әкесіне айналады. Сыныпта отырған 30 баланың әрқайсысын жеке тану деген қиын емес. Ол үшін ұстазға төленетін ақша көбірек болу керек, – деді Серікгүл Сәли сұхбат барысында.
Психологтың айтуынша, сол кезде әрбір бала мен ата-анасын жақын тануға болады.
– Ата-аналар жиналысына мүлдем келмей ме, өйтіп-бүйтіп барып бір көреді. Бала қандай отбасында өсіп жатыр, бала қандай қысымда өсіп келе жатыр. Осының бәрін біліп, баланың екінші анасы, әкесі бола алса ол бала жанынан, ішкі жан-дүниесінің есігін ашып, осы ұстазға орын береді. Ұстазын жақсы көрген бала мектептен шыққысы келмейді, бос уақытында мектепке келгісі келіп тұрады- дейді ол.
Еске сала кетсек, осыған дейін буллинг мәселесі тек жасөспірімдер мен жастардың арасында ғана емес ағайын-туыстың арасында да кездесетіні туралы айтқан еді.
