Қазақстанда кейбір отбасы айына бір қой сатып алады. Кейбірі өздері бағады, ал енді бірі сенімді адамдардан алғанды жөн көреді. Біз қазір еліміздегі бағаларға мониторинг жүргізетін боламыз.
Қой бағасы оның салмағы мен тұқымына қарай әртүрлі. Ең төмен баға Павлодарда. Мұнда қой құны 30 мың теңгеден басталады. Астана мен Алматыда қой 35 мың теңгеден сатылып жатыр. Алайда елордада баға 85 мың, ал Алматыда 150 мың теңгеге дейін жетеді.
Талдықорған, Атырау, Көкшетау, Қызылорда, Тараз бен Шымкентте баға 40 мың теңгеден басталады. Шымкентте қой бағасы салмағы мен тұқымына қарай 140 мың теңгеге дейін жетеді. Ал Таразда Құрбан айт кезінде қой бағасы 200 мың теңгеге дейін көтеріледі.
Семей, Қостанай мен Өскеменде қой бағасы 45-60 мың теңге аралығында. Оралда баға 45-80 мың теңге болып тұр. Ал Қарағандыда қой бағасы 150 мың теңгеге дейін жетеді.
Жезқазған мен Түркістанда қой бағасы 50 мың теңгеден басталып, кейде 120 мың теңгеге дейін жетеді. Өзгелерге қарағанда Ақтауда баға жоғары. Мұнда Шопан ата төлі 70 мың теңгеден басталып, 120 мың теңгеге дейін жетеді.
Сатушылар қой сою қызметін қатар ұсынады. Өскеменде бұл қызмет 2-5 мың теңге аралығында, ал Түркістанда 3-5 мың теңге тұрады. Қызылордада қойды 3-4 мың, Ақтөбеде 4 мың, Петропавлда 5-8 мың, Ақтауда 5-10 мың, Қарағандыда 10 мың теңгеге сойып береді. Қостанайда діни жолмен қой сою қызметі 10-20 мың теңге тұрады. Бірақ қазақстандықтар қойды сатып алып, өздері сойғанды жөн көреді.
