Алматы облысында интернет кеңістігінде жасалатын қылмыстардың алдын алу мақсатында «Алаяқтыққа жол жоқ» атты жедел-алдын алу шарасы жүргізіліп жатыр. Бұл бастама интернет-алаяқтыққа қарсы күреске бағытталған ауқымды жұмыстармен ерекшеленіп отыр, деп хабарлайды kaskelen.kz порталы.
Алматы облысы Полиция департаменті Киберқылмысқа қарсы іс-қимыл басқармасының басшысы Нұржан Кеңесханұлының мәлімдеуінше, жыл басынан бері өңірде 550 интернет-алаяқтық фактісі тіркелген. Оның ішінде 131 қылмыстық іс аяқталып, 114-і сотқа жолданған.
Көбіне кездесетін алаяқтық түрлері – банк қызметкері ретінде алдау, онлайн сауда мен инвестициялық ұсыныстар арқылы жалған мәміле жасау, сондай-ақ әлеуметтік көмек пен несиеге қатысты сылтауларды пайдалану.
«Алдын алу аясында 15 ақпараттық акция өткізіліп, 25 000 парақша таратылды, 11 билборд пен LED-экран орнатылды. 120 мектеп, 3 колледж және университетте кибергигиена бойынша сабақтар жүргізілді, 10 мақала, әлеуметтік желілерде 30-дан астам бейнеролик пен үндеу жарияланды», – деді Нұржан Кеңесханұлы.
Қазіргі таңда интернет-алаяқтықтың жаңа, әлдеқайда күрделі түрлері де белең алып отыр. Олардың қатарында:
-
Банктік алаяқтық – жалған қоңыраулар арқылы азаматтарды қорқытып, жеке деректерін алу;
-
Онлайн саудадағы алаяқтық – фейк парақшалар арқылы алдын ала төлем талап ету;
-
Жалған инвестициялар – күмәнді жарнамалар арқылы азаматтарды алдау;
-
Дипфейк технологиясы арқылы алдау – «туыс» не «басшы» атынан ақша сұрау;
-
Фишинг – жалған сілтемелер арқылы логин мен құпия сөзді ұрлау.
Полиция өкілдері азаматтарды қырағы болуға шақырып, кез келген күмәнді жағдай туындаған жағдайда «102» нөміріне дереу хабарласуды ұсынады.
