Бүгінде республикалық маңызы бар автожолдардың бойында 1 500-ге жуық жол бойы қызмет көрсету нысандары жұмыс істейді. Олардың қатарында шағын дәмханалардан бастап, ірі әрі заманауи кешендерге дейін бар. Бұл туралы «ҚазАвтоЖол» ұлттық компаниясы хабарлады.
Компанияның мәліметінше, жыл сайын жол бойындағы инфрақұрылымдардың саны артып қана қоймай, олардың сапасы мен көрсетілетін қызмет деңгейі де жақсарып келеді.
Жол бойындағы жаңа кешендер – тек аялдама емес
ҚазАвтоЖол мамандарының айтуынша, бүгінде жолдардың маңызды учаскелерінде жүргізушілер мен жолаушыларға арналған қауіпсіз әрі қолайлы демалыс аймақтары бой көтеруде. Олар жолаушылардың тек аялдап қана қоймай, толыққанды демалуына мүмкіндік береді. Мұндай кешендерде:
-
Заманауи автожанармай құю бекеттері;
-
Кафелер мен асханалар;
-
Қонақүй бөлмелері мен тынығу орындары;
-
Жеңіл және жүк көліктеріне арналған кең автотұрақтар;
-
Санитарлық тораптар – әжетхана мен душ кабиналары;
-
Мүмкіндігі шектеулі азаматтарға арналған арнайы инфрақұрылым қарастырылған.
«Мұндай кешендер – жай аялдама емес, бұл жанармай құйып, тамақтанып, демалып, тазаланып, жолды әрі қарай қауіпсіз жалғастыруға мүмкіндік беретін толыққанды сервис хабтары», – делінген компанияның ресми хабарламасында.
Жаңа стандарттар мен тазалық – басты басымдық
«ҚазАвтоЖол» жол бойындағы нысандардың санын арттырумен қатар, олардың тазалық, қолжетімділік және қызмет сапасына сай болуына ерекше назар аударып отыр. Жаңа кешендер көлік қозғалысы ең тығыз тіркелетін учаскелерге орналастырылып жатыр. Бұл – кез келген жүргізуші мен жолаушы, жүк тасымалдаушы немесе туристік сапардағы отбасы үшін жолдағы сервистің сенімді болуын қамтамасыз етуге бағытталған.
Инфрақұрылым дамуы жол сапасымен қатар жүріп жатыр
Айта кетейік, 2024 жылы республикалық жолдарды жөндеуге 781 миллиард теңге бөлінді. Бұл қаражат жолдардың сапасын арттырып қана қоймай, олардың бойындағы қосымша инфрақұрылымды дамытуға да мүмкіндік береді.
