Air Astana әуекомпаниясының рейсі қазір Израильде жүрген қазақстандықтарды алып кетпек, деп хабарлайды kaskelen.kz тілшісі.
“Бүгін сағат 08:00-де Air Astana әуекомпаниясының рейсі Алматыдан Тель-Авивке ұшып кетті. Қазақстандықтармен борттағы кері рейс Алматыға жергілікті уақыт бойынша сағат 23:45 шамасында келеді”, – деп хабарлады компания.
Бүгінгі таңда Қазақстанның Израильдегі елшілігінің консулдық есебінде елшілік қызметкерлері мен олардың отбасы мүшелерін қосқанда 77 адам бар екені белгілі болды. Израильдің жоғары оқу орындарында Қазақстаннан бес студент оқиды, сондай–ақ 30-ға жуық қазақстандық Израильдің әртүрлі медициналық мекемелерінде тағылымдамадан өтеді, барлығы – 112 адам.
Біздің Тель-Авивтегі дипломаттарымыз Израильдегі Қазақстан азаматтарымен тұрақты байланыста. Олармен жедел өзара іс-қимыл жасау үшін мессенджерде арнайы чат құрылды, оған Израильде уақытша және тұрақты тұратын 200-ге жуық ҚР азаматтары кірді.
Кейбір авиарейстердің тоқтатылуына және бірқатар авиатасымалдаушылардың Израильге рейстерді орындаудан бас тартуына байланысты Қазақстан елшілігі Air Astana-мен бірлесіп Қазақстанға оралуға ниет білдірген азаматтардың тізімін қалыптастыру бойынша жұмыс жүргізуде.
Сонымен қатар, қазіргі уақытта қаза тапқандар, зардап шеккендер немесе кепілге алынған Қазақстан азаматтары туралы ақпарат түспегені атап өтілді.
