Әлемге әйгілі испандық опера әншісі, дирижер Пласидо Доминго қазақстандық әнші Димаш Құдайбергенге дуэт жазуға ұсынды, деп хабарлайды kaskelen.kz тілшісі DearsDimash EurasianFanClub YouTube-арнасына сілтеме жасап.
Домингоның айтуынша, Димашты оған немересі таныстырған.
“Сені маған немерем көрсетті. Оған сенің өнерің ұнайды. Ол қазір небәрі 18 жаста, әрі барабаншы. Сені YouTube-тен көрген. Бұлай ән айтудың қалай болғанына таң қалды. Ол сенде алты октава бар екенін айтып, таңданысын жасырмады”, – деді Доминго.
Ал Димаш әлемдік опера әншісіне бес жасынан бастап оның әнін тыңдап өскенін жеткізді.
“Сізбен кездесу мен үшін үлкен мәртебе. Үйде сіздің концертіңіздің кассеталық жазбасы бар еді. Бес жасымнан бастап соны тыңдап, музыкаға сіздің арқаңызда келдім”, – деп жауап берді.
Сонымен қатар Пласидо Димашқа бірге дуэт орындауды ұсынды.
“Бізге бірге дуэт айту керек. Мен 20 жасымда нағыз дауысыммен ән айта алатынмын. Қазір тенорға тесситура жетпей жатыр. Бірақ сіздің жасыңызда қиындық тудырмайды деп ойлаймын. Біз керемет ән жазайық. Егер ыңғайлы болса, ертең репетиция жасайық”, – деді 82 жастағы маэстро.
