2023-2024 оқу жылының басында ұлттық тестілеу орталығының сайтында тестілеуге дайындалуға ұсынылған оқулықтар тізімі, үлгілік тест тапсырмалары, тест спецификациялары және жоспары жарияланды, деп хабарлайды kaskelen.kz порталы.
Оқушыға жылдағы дәстүр бойынша “Қазақстан тарихы” және “Дүниежүзі тарихы” пәндерінен тарих институтымен бірлесіп бекітілген 100 дата тізімі ұсынылды. Тестілеу барысында датаға қатысты кездесетін сұрақтар тек осы хронологиялық кестеден болады.
Бұған қоса ұлттық бірыңғай тестілеуде “Қазақ әдебиеті” мен “Орыс әдебиеті” пәндерінен кездесетін шығармалар тізімі (мектеп бағдарламасынан), сонымен қатар “Информатикадан” тестілеу сұрақтарында кездесетін немесе сұрақтың мазмұнын түсіну үшін қажет терминдер тізімі ұлттық тестілеу орталығының сайтында орналастырылды.
“Талапкерлерге тиімді болу үшін ҰБТ-ға дайындалуға арналған байқау сынақтарын іске қостық. Байқау сынағын өту кезінде түсуші тест тапсырмаларымен танысуға және таңдаған пәндері бойынша өзінің білім деңгейін тексеруге мүмкіндік алады. Менің ойымша, бұл балаларға өз дайындықтарын одан әрі жақсартуға көмектеседі”, – деді ұлттық тестілеу орталығының директоры Руслан Емелбаев.
Сондай-ақ 2024 жылғы түлектер үшін білім беру орталықтарының қолдауымен тегін онлайн сабақтар жүргізіліп жатыр. Бұл сабақтар білім беру орталықтарының YouTube арналарында тікелей эфирде өтіп, сақталады. Талапкерлер кез келген уақытта оларды қайта қарай алады.
