Полиция Алматының фитнес-орталықтарының бірінде блогер Әсел Асқармен болған оқиғаға қатысты жауап берді, деп хабарлайды kaskelen.kz.
Қалалық полиция департаментінің хабарлауынша, блогерді ұрған күдікті ер адам анықталды. Ол 27 жастағы азамат болып шықты. Оның әрекеттері Әкімшілік кодекс шеңберінде “ұсақ бұзақылық” және “ұрып-соғу”ретінде қарастырылды.
“Бұл фактіні Медеу аудандық полиция басқармасы тіркеп, тексеруде. 1996 жылы туған М.азаматқа қатысты ӘҚБтК – нің 73-1 (“ұрып-соғу”) және ӘҚБтК-нің 434 (“ұсақ бұзақылық”) баптары бойынша әкімшілік іс қозғалды”, – деді ПД баспасөз қызметі.
Сондай-ақ, құқық қорғау органдары Әсел Асқарға алған жарақаттарының ауырлығын анықтау үшін сараптама тағайындады.
“Азамат А. алған дене жарақаттарының ауырлық дәрежесін анықтау мақсатында сот-медициналық сараптама тағайындалды. Шешім шығару үшін іс жүргізу материалдары сотқа жіберіледі”, – деп толықтырды ведомстводан.
Тергеу барысы Алматы ПД басшылығының бақылауында екені атап өтілді.
Бұған дейін Әсел Асқар “Роял” фитнес-клубында оны бірнеше рет кәсіби балуан, грек – рим күресінен чемпион ер адам ұрғанын айтқан болатын. Сондай-ақ, қыз оған қауіп төніп тұрғанын айтты.
