Өз еркімен елге келіп ұсталған Әбілязовтың сыбайласы әрі нағашы ағасы Қуаныш Нұргазин елге не үшін оралғанын айтты деп хабарлайды Kaskelen.kz тілшісі Almaty.tv телеарнасына сілтеме жасай отырып.
73 жастағы Қуаныш Нұрғазин есімді бұл кісіні кезінде Мұхтар Әбілязов 2007 жылы BSC компаниясының номиналды директоры етіп тағайындайды. Бас прокуратураның мәліметіне сәйкес, Әбілязов және оның сыбайластары осы компанияны заңсыз несиелендіру арқылы БТА банктен аса ірі көлемде қаражат жымқырған. Құзырлы орган өкілдері Нұрғазин сол кезде бұл іске қатысы бола тұра ешқайда кетпеу туралы міндеттемені бұзып, қылмыстық жауапкершіліктен жалтару үшін соттан жасырынғанын айтады. Нұрғазин осылайша 2012 жылы Қазақстаннан Литваға кетіп, өзге елде 12 жыл бойы босқын мәртебесімен жүріпті.
Ал соңғы 5 жылда жиенімен байланысы үзілгендіктен қаржылай қолдау да болмаған көрінеді. Айта кетейік, ол Қазақстанға келу үшін Литваның саяси қамқорлығынан да бас тартқан екен.
« Менің 12 жыл өмірім жиенім үшін шетелде өтті. Қазақстанға оралу өз шешімім болды. Мен шетелде жүрген қашқындарға соттың әділ шешімі болатынын айтқым келеді. «Отан оттан да ыстық». Сондықтан қайту керек деп есептеймін», – деді Қуаныш Нұрғазин «Алматы» теларнасына берген сұхбатында.
Айта кетейік, Нұрғазин Алматы әуежайында ұсталған еді. Ол денсаулығына байланысты үйқамаққа алынды.
