Ақтауда салмағы 6 келі 800 грамнан асатын сәби дүниеге келді, деп хабарлайды kaskelen.kz.
Сәбидің анасы Мұнайлы ауданының тұрғыны, бұл оның төртінші баласы екен. Дәрігерлердің айтуынша, қазір ана мен баланың жағдайы жақсы.
“Тексеру кезінде әйелдегі сәбидің өте үлкен екенін анықтадық. Сосын кеңес жинап, әйелді кесарь тілігі арқылы босандыру керек деп шештік. Ота сәтті өтті. Мұндай жағдайлар сирек кездеседі. Осындай салмақтағы сәбилердің туылуы ерекше құбылыс”, – делінген облыстық перинаталдық орталықтың хабарламасында.
Бала мен оның анасы бірнеше күн дәрігерлердің бақылауында болып, кейін үйлеріне шығарылды. Шыққан кезде баланың салмағы 6 келі 280 грамм болған.
