Өнеркәсіп және құрылыс министрі Қанат Шарлапаев Үкімет отырысында Қазақстанда жыл соңына дейін қандай зауыттар іске қосылатынын айтты, деп хабарлайды kaskelen.kz тілшісі.
Қанат Шарлапаев 2023 жылдың соңына дейін жүзеге асырылып жатқан негізгі жобаларды атап өтті.
“Қарағанды облысында желтоқсан айында өнімділігі жылына 1,1 млн бірлікке дейін тұрмыстық техника өндірісін іске қосу жоспарлануда. Зауытта теледидарлар, электр су жылытқыштар, шаңсорғыштар, ас үй плиталары, шағын пештер, ас үй сорғыштары, ARTEL брендімен жартылай автоматты кір жуғыш машиналар жасалады”,-деді министр.
Оның айтуынша, зауытта 530 жаңа жұмыс орнын ашу жоспарлануда.
Сондай-ақ, ағымдағы жылдың желтоқсан айында арнайы кокс шығаратын заманауи зауытты іске қосу жоспарлануда. Кәсіпорынның қуаттылығы жылына 400 мың тоннаны құрайды, онда 261 жаңа жұмыс орны құрылады. Бұл өнім ERG кәсіпорындарының ішкі қажеттіліктерін кейіннен экспортқа шығумен қамтамасыз етуге мүмкіндік береді.
Қостанай облысында Chevrolet Onix автомобильдерін шағын тораптық әдіспен (CKD) өндіруді бастау жоспарлануда.
“Жылына 30 мың бірлік шығару жоспарлануда, бұл ішкі сұранысты қамтамасыз етуге және 400 жұмыс орнын құруға мүмкіндік береді”, – деді Қанат Шарлапаев.
