Еңбек және әлеуметтік қорғау комитеті Қарағанды облысының балаларға арналған арнаулы әлеуметтік қызметтер көрсету орталығында уланған тағы екі бала ауруханаға жеткізілгенін мәлімдеді, деп хабарлайды Kaskelen.kz
Еңбек министрлігіне қарасты еңбек және әлеуметтік қорғау комитетінің төрағасы Төлеген Оспанқұлов Қарағанды облысының балаларға арналған арнаулы әлеуметтік қызметтер көрсету орталығында жоспардан тыс шұғыл тексеру жүргізу мақсатында Қарағанды облысына барды.
“Балалардың жағдайы тұрақты, нашарлаған жоқ. 1 тамызда жаңадан түскен екі баланың біреуінің жағдайы орташа ауырлықта, екіншісі қанағаттанарлық. Екеуі де бөлімшеде жатыр. Жағдайы тұрақты”, – делінген хабарламада.
Облыстық клиникалық аурухананың жұқпалы аурулар орталығының бөлімшесінде емделіп жатқан екі бала үйге шығарылды. Олар дәрігерлердің бақылауында.
Сондай-ақ, Қарағанды облыстық мүмкіндігі шектеулі балаларға әлеуметтік қызмет көрсету орталығы емханалардың медицина қызметкерлерінің кезекшілігін ұйымдастырғаны айтылды.
Естеріңізге сала кетейік, 2023 жылғы 30-31 шілдеде Қарағанды облысының балаларға арналған арнаулы әлеуметтік қызмет көрсету орталығында қызмет алып жатқан 12 мүгедектігі бар бала Қарағанды қаласының көпсалалы балалар ауруханасына жатқызылды.
Оның ішінде 2009 жылы туған бала қайтыс болды.
