Сенат депутаттары екі оқылымда балаларға Қазақстан Республикасының Ұлттық қорынан қаражат есептеу, оларды төлеу және пайдалану туралы заңды мақұлдады, деп хабарлайды kaskelen.kz тілшісі.
Заң Президент Қасым-Жомарт Тоқаевтың 2024 жылғы 1 қаңтардан бастап “Ұлттық қор – балаларға” жобасын іске асыру қажеттігі туралы тапсырмасын іске асыру үшін әзірленді.
“Заң Қазақстан Республикасы азаматтарының жас буыны кәмелетке толған кезде тұрғын үй жағдайларын жақсартуға немесе 18 жасқа толғаннан кейін жинақ есебінен білім алуға мүмкіндік беру арқылы қолдауға бағытталған. Заң Ұлттық қордың жыл сайынғы инвестициялық табысының 50%-ын 18 жасқа толғанға дейін балалардың арнайы жинақтау шоттарына, оларды кейіннен тұрғын үй сатып алуға және білім алуға пайдалану мүмкіндігімен мерзімінен бұрын алу құқығынсыз аударуды көздейді”, – делінген Парламент Сенатының қорытындысы бойынша.
Қаражатты пайдалану кезінде мемлекеттік білім беру жинақтау жүйесі (МБЖЖ) саласындағы және тұрғын үй құрылысы жинақтары саласындағы заңнаманың немесе тұрғын үй сатып алу (үлестік құрылысқа қатысу) туралы шарттың талаптарын сақтау қажет болады.
“2024 жылғы 1 қаңтардан бастап Қазақстан Республикасының азаматтары болып табылатын балаларға арнаулы жинақтау шоттарына жыл сайын 18 жасқа толғанға дейін нысаналы жинақтар есептелетін болады. 2024 жылғы 1 қаңтарға дейін туған Қазақстан Республикасының азаматтары болып табылатын балаларға есептелетін жыл сайынғы нысаналы жинақтардың саны олар он сегіз жасқа толғанға дейін қалған жылдар санына тең”, – делінген Сенаттың Қорытындысында.
2022 жылы Мемлекет басшысы Қазақстан халқына Жолдауында “Ұлттық қор – балаларға” атты жаңа бағдарламаның іске қосылатынын жариялады. Президент жыл сайын Ұлттық қордың инвестициялық табысының 50%-ын балалардың кәмелетке толғанға дейінгі арнайы жинақтаушы шоттарына аударуды ұсынды.
