Төтенше жағдайлар министрлігі Түркістан облысында Сырдария өзеніне батып кеткен 11 адамның жасы туралы мәлімет таратты, деп хабарлайды kaskelen.kz ведомствоның баспасөз қызметіне сілтеме жасап.
Ведомство мәліметінше, 2023 жылғы 21 тамызда сағат 17:40-та Түркістан облысы Отырар ауданында, Көксарай ауылынан 3 км жерде, Сырдария өзенінде шомылуға рұқсат етілмеген жерде шомылу кезінде 11 адам суға батып кетті.
“Бүгінгі таңда суға батқан 11 адамның ішінен ТЖД күшімен 9 адамның, оның ішінде 3 әйелдің және 6 кәмелетке толмаған баланың денесі табылып, судан шығарылды. 2 кәмелетке толмаған баланы іздестіру жұмыстары жүргізілуде. Белгілі болғандай, демалыста 20 адамнан тұратын 4 отбасы болған”, – делінген хабарламада.
Қазіргі таңда 9 адамның денесі табылған. Олар:
- 1983 жылы туған әйел;
- 2006 жылы туған қыз бала;
- 2004 жылы туған бойжеткен;
- 2019 жылы туған қыз бала;
- 2015 жылы туған қыз бала;
- 2017 жылы туған қыз бала;
- 2006 жылы туған ұл бала;
- 2009 жылы туған ұл бала;
- 1998 жылы туған әйел.
Сондай-ақ 2011 жылы туған ұл бала мен 2013 жылы туған қыз бала іздестірілуде.
ТЖД-да жедел штаб құрылды, жедел желі жұмыс істейді (8725 33 5-78-81). Түркістан облысы ТЖД басшылығы оқиға орнында жағдайды бақылауда ұстауда.
ТЖМ мәліметінше, іздеу жұмыстарына барлығы 150 адам, 18 бірлік техника, 2 дрон және 6 жүзу құралы жұмылдырылды.
Оқиғаның мән-жайын Түркістан облысының Полиция департаменті анықтауда.
“Суда болған жағдайда қауіпсіздік шараларын қатан сақтау қажет. Тек шомылуға рұқсат етілген жерлерде суға тұсіңіздер! Балаларды қараусыз қалдырмаңыздар! Мас күйінде суға түсіге тыйым салынады”, – деп ескертті ТЖМ.
