Жамбыл облысы Байзақ ауданында мектеп асханасынан ас ішкен балалар мен ересектер жаппай уланды, деп хабарлайды kaskelen.kz ақпарат агенттігі.
Облыстық денсаулық сақтау басқармасының баспасөз қызметінің хабарлауынша, Байзақ ауданының орталық аудандық ауруханасына 48 адам келіп түскен. Олар мектеп асханасында түскі ас ішкеннен кейін уланған. Оның 35-і ауруханаға жатқызылды.
Негізінен 7-10 жасар балалар келіп түсті. Бәрі — Байзақтағы Н. Киікбаев атындағы орта мектептің оқушылары. Зардап шеккендерге “жіті тамақ токсикоинфекциясы” диагнозы қойылды, – делінген хабарламада.
Дәрігерлер ауруханаға жатқызылғандардың жағдайын орташа ауыр және бірқалыпты деп бағалап отыр.
Инфекционист, педиатр, токсиколог, реаниматолог-анестезиолог мамандар бүкіл диагностикалық және емдеу шараларын жасап жатыр.
Пациенттерге медициналық көмек көрсету үшін ҚР бас инфекционисімен консультация жүргізіледі. Жағдай тұрақты, бәрі облыстың денсаулық сақтау басқармасының бақылауында, – деп нақтылады басқарманың баспасөз қызметі.
Облыс әкімдігі арнайы комиссия құрылып, мектеп толығымен оқшауланғанын мәлімдеді. Онда бактериологиялық зерттеулер жүргізіледі. Ал мектепте тамақтануға жауапты “Токсеитов” ЖК жұмысы толығымен тоқтатылды.
