Алматы облысында жеке тұрғын үй құрылысы үшін берілген 300-ден астам жер телімінің иелері сатып алған жерлерінен айырылып қаламыз ба деп қорқып отыр. Өйткені, мемлекеттік органдар сату-сатып алу шартын заңсыз деп тану туралы талап арызбен сотқа жүгінген, деп хабарлайды kaskelen.kz ақпараттық агенттігі 31-арна жаңалықтарына сілтеме жасап.
Қарасай ауданындағы 21-ші квартал деп аталатын елді-мекен тұрғындары бұған дейін емен-жарқын өмір сүрген. Алайда ұзақ жылдар бойы тұрып келген жер телімдерін заңсыз деп тану бойынша сотқа түскен арызды естіген жайсыз хабар төбемізден жай түскендей әсер етті, дейді олар.
Жердің де, баспананың да мемлекеттік актілері бола тұра, жылжымайтын мүліктері неге бір сәтте заңсыз бола қалатынын анықтап беруді сұрайды.
“Жер шаруашылығы министрлігінің арызымен прокуратура сотқа арыз берген. Мына договорлардың бәрін аннулировать деп. 19:46 Юстициядан бұл бірнеше рет өткен. Кадастрдан да бірнеше рет өткен. Сол заманда заңсыз деп табылмай, енді келіп бәлен уақыт өткеннен кейін үй салып, жер салып бүкіл коммуникацияны өзіміз жеке меншіктен жүргізіп болғаннан кейін заңсыз деп танымақшы бұл жерлерді”, – дейді Қарасай ауданының тұрғыны Самат Оспанов.
Ақпаратқа сәйкес, Үлкен Алматы айналма жолының жанында орналасқан 21 квартал елді-мекенінің жерін 2004 жылы жеке адам мемлекеттен сатып алған екен. Ал 2005 жылы жер учаскесін нысаналы тағайындауын жеке тұрғын үй құрылысы үшін өзгерткен. Содан ұзақ жыл бос жатқан жерді 2016 жылдан бері 326 учаскеге бөліп көпке сата бастаған. Тіпті әуел баста мемлекетке төлеп сатып алған 14 миллион қаражатымның түбіртегі де сақтаулы.
Мына жерде тұрған адамдардың әрқайсысына 6-8 соттық жерлерден өзім саттым. Себебі, мен мемлекетке ақысын төлеп заңды түрде алған болатынмын. Әуел баста толыққанды 30 гектар жер болған. Сол уақытта барлық жауапты органдардан қол қойғызып заңды түрде рәсімдедім, – дейді жеке тұлға Владимир Барышев.
Бүгін даулы мәселенің алғашқы сот дайындығы өтті. Жерін даулаған жұрт тайлы-тұяғы қалмай тегіс Қарасай ауданындағы сот залына жиналды. Бірақ талап беруші тараптан ешкім төбе көрсетпеді. Желтоқсанның төрті күні алғашқы сот отырысы басталмақ. Әзірге талап берушілердің нақты не үшін бұл жерді заңсыз деп азаматтық сотқа жүгінгені белгісіз.
