Талдықорған полиция департаментінің бастығы қыз зорлады деген күдікке ілікті. Оқиғаның мән-жайымен жәбірленушінің адвокаты бөлісті, деп хабарлайды kaskelen.kz ақпарат агенттігі Оrda.kz-ке сілтеме жасап.
Адвокаттың айтуынша, бойжеткенді 12 қараша күні сағат 08:00-де учаскелік полиция қызметкері тыныштық бұзды деген айыппен полиция бөліміне жеткізген.
“Департамент бастығы бойжеткенді тергеуші кабинетінде тергеу барысында көрген. Қоластындағы қызметкерлеріне қызды өз кабинетіне әкелуді тапсырғанына қарағанда, бойжеткен оның “көзіне түскен” болуы керек. Қорғалушым полиция бастығына басынан қандай жағдай өткенін айтқаннан кейін, ол оның әдемі бойжеткен екенін айтып, онымен жыныстық қатынасқа түсуге ұсынған. Ол істі жауып, оны қай жерде болмасын “қорғайтынын” жеткізді. Қыз бас тартқанына қарамастан, қалалық полиция департаментінің бастығы оны бас салып, зорлаған”, – деді жәбірленушінің адвокаты Нұрлан Молбаев.
Қорғаушының сөзінше, бойжеткен шамамен 14:00-де көмек сұрап хабарласқан. Олар дереу Жетісу облысы полиция департаментінің жеке қауіпсіздік қызметіне, сондай-ақ облыстық прокуратураға арыз жазды.
Сондай-ақ, жәбірленуші барлық қажетті тексерістен өтті. Ал полиция басқармасы бастығының кабинетінен заттай айғақтар (шәует, бойжеткеннің шашы мен төсеніштері) табылды.
Аталған факті бойынша ҚР Қылмыстық Кодексінің 120-бабы, 2-бөлігі “Зорлау” бойынша тіркелді. Күдікті Ескелді ауданы уақытша ұстау изоляторына қамалды. Қазіргі уақытта сотқа дейінге тергеу жүргізілуде.
