Мәжілістің жалпы отырысында 2024 жылғы республикалық бюджеттің атқарылуы туралы Үкіметтің есебі қаралды. ҚР Қаржы министрі Мәди Такиев үш ірі ұлттық жобаның қорытындысын жария етті. Бұл — «Жайлы мектеп», «Ауылда денсаулық сақтауды жаңғырту» және «Қолжетімді интернет» бағдарламалары.
«Жайлы мектеп»: 254 мың оқушыға жаңа орын
Мәди Такиевтің айтуынша, «Жайлы мектеп» ұлттық жобасына 647 миллиард теңге бөлініп, аймақтарға толықтай аударылды. Нәтижесінде 105 жаңа мектеп салынып, 254 мың оқушы орны ашылды.
«2025 жылы тағы 112 мектепті пайдалануға беру жоспарланған», – деді Қаржы министрі.
Жоба сапалы білім беру инфрақұрылымын қалыптастыруды, оқушы орындарының тапшылығын жоюды және үш ауысымды оқытуды қысқартуды көздейді.
Ауылдағы медицина: 460 нысан пайдалануға берілді
«Ауылда денсаулық сақтауды жаңғырту» ұлттық жобасына 91,3 миллиард теңге бөлінген. Қазіргі таңда 460 денсаулық сақтау нысанының құрылысы аяқталып, пайдалануға берілді. Сонымен бірге, 2025 жылдың соңына дейін тағы 195 нысан салынып, 32 көпсалалы аудандық аурухана жаңғыртылады.
«Медицина кадрларының тапшылығын төмендету бойынша оң серпін байқалады. 2023 жылмен салыстырғанда дәрігерлер тапшылығы 17 пайызға төмендеді», – деді Мәди Такиев.
Бұл көрсеткіш шалғай ауыл тұрғындарының медициналық қызметке қолжетімділігін жақсартуға сеп болады.
Қолжетімді интернет: 5G таралу ауқымы кеңейіп келеді
Үшінші ұлттық жоба — «Қолжетімді интернет». Министр мәліметінше, бұл бастамаға 13 миллиард теңге жұмсалды.
«5G-мен республикалық маңызы бар қалалар 30 пайызға, облыстық маңызы бар қалалар 15 пайызға қамтылды», – деді министр.
Еске салайық, 2027 жылдың соңына дейін байланыс операторлары 5G желісін дамытуға 450 млрд теңге инвестиция салмақ. Осы жобаның арқасында республикалық маңызы бар қалалардың 75 пайызы, ал облыс орталықтарының 60 пайызы 5G технологиясымен қамтылады деп жоспарланған.
