2025 жылғы маусым айындағы тұрғын үй нарығы бойынша ең жоғары баға Алматы қаласында тіркелді, деп хабарлайды kaskelen.kz порталы.
Алматы — тұрғын үй бағасы бойынша көшбасшы
Ұлттық статистика бюросының мәліметінше, Алматыда жаңа тұрғын үйдің бір шаршы метрінің орташа құны – 647 728 теңге. Қайталама нарықтағы баспана одан да қымбат – 681 923 теңге.
Астана екінші орында
Елордада жаңа тұрғын үйдің шаршы метрі – 593 764 теңге, ал қайталама нарықтағы пәтерлердің бағасы 642 702 теңгеге жетеді.
Үздік бестікке кіретін қалалар:
-
Атырау: жаңа үй – 512 205 теңге, қайталама — 482 711 теңге;
-
Шымкент: жаңа үй – 502 636 теңге, қайталама — 438 290 теңге;
-
Семей: жаңа үй – 453 834 теңге, қайталама — 430 943 теңге.
Бұл көрсеткіштер өңірлер бойынша тұрғын үй нарығындағы белсенділікті және сұраныс деңгейін сипаттайды. Қалалар бойынша баға айырмашылығы тұрғын үй сапасына, инфрақұрылымға, сұранысқа және өңірлік экономикалық даму деңгейіне байланысты қалыптасып отыр.
Тұрғын үй нарығындағы өзгерістер
Айта кетейік, бұған дейін Қазақстан Ұлттық Банкі “Қазақстан Республикасы Ұлттық Банкі Басқармасының кейбір қаулыларына өзгерістер мен толықтырулар енгізу туралы” қаулы жобасын әзірлегенін хабарлаған болатын. Бұл бастама тұрғын үй нарығы мен ипотекалық қаржыландыру саласындағы жаңа реттеуші шараларды енгізуді көздейді.
