Данияның Әлеуметтік талдау орталығы қатарынан алтыншы жыл өмір сүруге ең қолайлы және бақытты қалалардың жаһандық рейтингін жариялап келеді. 2025 жылғы тізімге биыл алғаш рет Венгрияның екі бірдей қаласы еніп, аймақтық дамудың жаңа серпінін көрсетті.
Бақыт көрсеткіші 82 критерийге негізделеді
Рейтинг 82 түрлі көрсеткішке негізделген. Олардың қатарында азаматтық белсенділік, басқару сапасы, қоршаған орта, денсаулық сақтау жүйесінің тиімділігі, экономикалық тұрақтылық және көлік инфрақұрылымы сияқты алты негізгі санат бар.
Копенгаген көш бастап тұр
AZƏRTAC агенттігінің хабарлауынша, Копенгаген биылғы рейтингте бірінші орыннан көрінді. Бұл қала жыл сайын бақытты тұрғындар саны, әлеуметтік қолдау деңгейі және экологиялық стандарттар бойынша жоғары көрсеткіштерге ие болып келеді.
Венгрия қалалары рейтингке енді
Будапешт 700 ұпаймен 110-орынға тұрақтады. Бұл – Орталық және Шығыс Еуропадағы кейбір ірі қалаларды артта қалдырған нәтиже. Мәселен, Прага 153-орынға, София 155-орынға, ал Варшава 175-орынға ие болды.
Будапештпен бірге рейтингке Венгрияның тағы бір ірі қаласы – Дебрецен де енді. Ол 646 ұпай жинап, 145-орыннан көрінді. Халық саны бойынша елде екінші орында тұрған қала әлеуметтік әл-ауқат көрсеткіштері бойынша 160 ұпай, ал экологиялық көрсеткіштер бойынша 137 ұпай жинап, оң нәтиже көрсетті.
Үздік ондықты кімдер құрады?
2025 жылғы ең бақытты қалалар рейтингінде Солтүстік және Батыс Еуропа, сондай-ақ Азия елдерінің мегаполистері көш бастады. Үздік ондық төмендегідей:
-
Копенгаген (Дания)
-
Цюрих (Швейцария)
-
Сингапур (Сингапур Республикасы)
-
Орхус (Дания)
-
Антверпен (Бельгия)
-
Сеул (Оңтүстік Корея)
-
Стокгольм (Швеция)
-
Тайбэй (Тайвань, ҚХР)
-
Мюнхен (Германия)
-
Роттердам (Нидерланды)
Рейтингтің нәтижелері қалалардың әлеуметтік-экономикалық саясатының тиімділігін және тұрғындардың өмір сапасын бағалаудың маңызды құралына айналып отыр. Копенгагеннің көш басында тұруы Данияның тұрақты даму мен азаматтық әл-ауқатты ұштастырған моделін тағы бір мәрте дәлелдеді.
