Бүгін Мәжіліс отырысынан кейін Бас прокурордың орынбасары Әсет Шындалиев әскерге шақыру кезінде күш қолдану фактілеріне қатысты пікір білдірді, деп хабарлайды kaskelen.kz порталы.
– Әскери комиссариаттарға байланысты әрбір жағдайды жеке қарау керек. Өйткені, түрлі жайттар болуы мүмкін. Мысалы, азамат шақыртудан қашып жүрген болса, не шақырту алғаны туралы хабардар ма – соны анықтау қажет, – деді ол журналистердің сауалына жауап бере отырып.
Шындалиев бұл мәселеде нақты бір ұстаным айту қиын екенін атап өтті. Оның айтуынша, аталған кейстермен жеке таныс емес.
Еске салсақ, бұған дейін Түркияда оқып жүрген студенттің Қазақстанға уақытша келген кезінде әскерилер тарапынан күшпен әкетілгені туралы ақпарат тараған болатын. Қоғам наразылығынан кейін студент босатылған.
