2025 жылы Қазақстанда жеңіл өнеркәсіп өнімдері, сыра, мотор майлары және зергерлік бұйымдар үшін міндетті цифрлық таңбалау жүйесі енгізіледі. Бұл туралы Сауда және интеграция вице-министрі Әсет Нүсіпов Орталық коммуникациялар қызметінде өткен брифинг барысында мәлімдеді.
«Сондай-ақ, биологиялық белсенді қоспалар, киік мүйізінен және тұрмыстық химиядан жасалған өнімдерді таңбалау бойынша пилоттық жобалар іске асырылып жатыр. Жүйе өнімнің өндірушіден тұтынушыға дейінгі жолын бақылауға, көлеңкелі нарық көлемін азайтуға және салық жинауды арттыруға мүмкіндік береді», – деді вице-министр.
Цифрлық таңбалау жүйесі – өнімдердің заңды айналымын қамтамасыз етуге бағытталған маңызды құрал. Оның көмегімен тұтынушылар сапасыз немесе контрафакт өнімнен қорғалып, ал мемлекет пен бизнес ашықтыққа қол жеткізеді.
Бұған дейін Өнеркәсіп және құрылыс министрлігі Өнеркәсіп комитеті төрағасының орынбасары Мұхамед Андаков та цифрлық таңбалау мәселесіне тоқталып, бұл бастаманың көлеңкелі экономикамен күрестегі рөліне назар аударған болатын. Ол цифрлық таңбалау тетігі тауар қозғалысын толық бақылауға мүмкіндік беретінін атап өтті.
