Мегаполисте 406 мыңнан астам шағын және орта бизнес субъектілері тіркелген. Бұл туралы Өңірлік коммуникациялар қызметінің брифингінде Алматы қаласының «Атамекен» өңірлік кәсіпкерлер палатасының директоры Нұрсұлтан Шоқанов мәлімдеді, деп хабарлайды kaskelen.kz тілшісі.
Оның сөзінше, алматылықтар кәсіпкерлер биыл 4 ай ішінде 2 трлн теңгеге жуық салық төлеген. Жалпы салық түсімдерінің 40%-ы шетелдік компанияларға тиесілі.
«Алматы – қазақстандық кәсіпкерліктің орталығы. Өткен жылы ғана республикалық қазынаға Алматы бизнесі 5 трлн теңгеден астам қаржы аударған. 2024 жылдың 4 айында – 1,7 трлн теңгеден астам салық төленді. Бір қызығы, шетелдік қатысуы бар кәсіпорындардың үлесіне салық түсімдерінің 40%-ға жуығы тиесілі, яғни Алматы халықаралық бизнес жүргізілетін қалалар арасында өңірлік көшбасшы мәртебесін растайды», – деді Нұрсұлтан Шоқанов.
Сонымен қатар ол Алматы қаласының ӨКП құрылымында құқықтық қорғау, қоғамдық мониторинг және мемлекеттік органдармен өзара іс-қимыл бөлімі жұмыс істейтінін атап өтті. Бұл бөлім кәсіпкерлерге жан-жақты құқықтық көмек көрсетеді.
«Тек 2023 жылдың өзінде Алматы қаласының ӨКП бизнестің 2720 өтінішін қарады. Біздің араласуымыздан кейін 6 мыңнан астам кәсіпкердің құқықтары қорғалды. Негізінен келісім комиссиясының материалдары бойынша заңсыз есептелген айыппұлдар, өсімпұлдар, қосымша есептеулер, мүліктік шығындардың алдын алды», – деді ол.
