Алматы облысының Өңірілік коммуникациялар қызметінде аймақтағы демалыс орындарының шомылу маусымына дайындығы жайлы брифинг өтті, деп хабарлайды kaskelen.kz порталы.
Брифинг барысында облыс аумағында 103 демалыс орны бар екені хабарланды. Олардың 97-сі Қонаев қаласында, біреуі Еңбекшіқазақ ауданында және бесеуі Іле ауданында орналасқан. Алматы облысының Бас мемлекеттік санитариялық дәрігері Марат Исмаилов демалыс пен сауықтыру ұйымдарына бақылау жұмыстары жүргізілгенін айтты.
— Шомылу маусымы басталар тұста санитарлық қызмет мамандары су қоймаларының суы мен жағажайлардағы құмның талапқа сәйкестігіне зертханалық зерттеулер жүргізеді. Биыл мамандар 123 су сынамасы мен 30 топырақ түрін сараптамадан өткізген. Зерттеулердің нәтижелері бойынша су мен топырақ үлгілері гигиеналық нормативтердің талаптарына сәйкес келді, — деді Марат Исмаилов.
Сонымен қатар ол рұқсат етілмеген ашық су нысандарында шомылу лептоспироз, вирусты гепатит, ротовирустық инфекциялар, гельминтоз сияқты ауруларды жұқтыруға әкелуі мүмкін екенін ескертті. Сондықтан спикердің айтуынша, су сапасы тексерілген, халықтың жаппай шомылатын ресми орындарында ғана шомылу керек және суға түсуге рұқсат етілген арнайы ақпараттық белгілерге назар аудару қажет.
