Алматыда 8 ақпанға қараған түні Медеу ауданы Тау-Самал шағынауданында техногендік сипаттағы топырақтың батпақтануына байланысты сырғыма түскен, деп хабарлайды kaskelen.kz.
“Техногенді сипаттағы топырақтың батпақтануынан көлемі 3200 текше метр сырғыма түсті. 2 жеке тұрғын үйге, оның ішінде біреуіне ішінара зақым келді. Алдын ала ақпаратқа сәйкес, үйлерде төрт адам, оның ішінде екі бала болған”, – делінген төтенше жағдайлар департаментінің ресми мәлімдемесінде.
Оқиға орнында “Қазселденқорғау” ММ, Алматы қаласының “109 құтқару қызметі” ММ, Республикалық жедел-құтқару жасағынан, Алматы қаласы ТЖД, ТЖМ 28237 әскери бөлімінен, жедел медициналық көмек бригадасынан, Медеу ауданының әкімдігінен 160-тан астам адам және 30 бірлік техника жұмылдырылды.
“Жақын маңдағы үйлердің тұрғындары эвакуацияланды. Жинау пунктіне орналастырылғаннан кейін бірнеше сағат өткен соң, тұрғындар өз еркімен достары мен туыстарына кетті. Дәрігерлер бригадасы кезекшілікті жалғастырады. Жергілікті жерде ТЖД психологиялық тобы жұмыс істеп жатыр. Тек ресми деректерге сенуді сұраймыз”, – деп мәлімдеді ТЖД.
Сонымен қатар оқиға орнына Алматы әкімі Ерболат Досаев та барды. Төтенше жағдайға байланысты ол 8 ақпанға жоспарланған тұрғындармен кездесуін кейінге қалдырды. Ал құтқарушыларға іздеу жұмыстарын тоқтатпауды тапсырды.
“Басты міндет – іздеу-құтқару жұмыстары. Осы үйде тұрған адамдарды іздеу бойынша мобилизациялық топтың барлығы тоқтаусыз жұмыс істеуі қажет”, – деді қала басшысы.
Сондай-ақ, төтенше жағдайлар департаменті cел көшкініне құбырдың бұзылуы мен топырақтың батпақтануы себеп болғанын мәлімдеді.
“Сел көшкініне суық су құбырының бұзылып, топырақтың батпақтануы себеп болды. Көшкіннің көлемі – 3200 текше метр. “Қазселденқорғау” ММ күштері мен құралдары, 109 құтқару қызметі, республикалық жедел-құтқару жасағынан, Алматы қаласы ТЖД, ТЖМ 28237 әскери бөлімінен, жедел медициналық көмек бригадасынан, Медеу ауданының әкімдігінен 160-тан астам адам және 30 бірлік техника жұмылдырылды”, – делінген Алматы қалалық төтенше жағдайлар департаментінің хабарламасында.
