Қазақстан азаматтарының шетелде туған сәбилерін тіркеу екі жолмен жүзеге асырылады: елшілік немесе консулдық мекемелер арқылы не Қазақстан аумағындағы тіркеу органдарында — ата-аналардың немесе олардың біреуінің қалауы бойынша, деп хабарлайды kaskelen.kz порталы.
Бұл жөнінде Қазақстан Республикасының Әділет министрлігі мәлімдеді.
«Неке (ерлі-зайыптылық) және отбасы туралы» Кодекске сәйкес, баланың тууын ресми тіркеу үшін төмендегі құжаттардың бірі ұсынылуы қажет:
-
баланың туу туралы куәлігінің түпнұсқасы,
-
туу туралы акт жазбасынан алынған көшірме,
-
медициналық мекеме берген туу туралы анықтаманың түпнұсқасы.
Егер ата-аналар шетелде некеге тұрған болса, қосымша неке туралы куәлік те қоса тіркелуі тиіс.
Бала өмірге келген күннен бастап екі айдан кейін өтініш берілсе, кешіктірілу себебін түсіндіретін жазбаша түсіндірме хат ұсынылуы қажет.
Өтінішті қағаз жүзінде де, электронды түрде eGov.kz порталы арқылы да жолдауға болады. Бұл, әсіресе, шетелде тұратын азаматтар үшін тиімді. Қызмет көрсету мерзімі — онлайн өтініш берген жағдайда 3 жұмыс күні, ал жеке өтініш білдіргенде 5 жұмыс күні ішінде жүзеге асырылады.
