Атом энергетикасы тақырыбына қатысты сұрақтар қоғамда үлкен қызығушылық пен алаңдаушылық тудырады. Әсіресе атом электр стансасынан (АЭС) шығатын радиоактивті қалдықтардың қауіпсіз өңделуі мен сақталуы – маңызды мәселе. Бұл сұраққа Экология және табиғи ресурстар вице-министрі Жомарт Әлиев Астанада өткен IX Еуразиялық бизнес форумда жауап берді.
Радиоактивті қалдықтарды Экологиялық кодекс емес, арнайы заң реттейді
Жомарт Әлиевтің айтуынша, радиоактивті қалдықтарды басқару мәселесі Қазақстанның Экологиялық кодексімен емес, жеке заңмен реттеледі. Бұл бағытқа қазір жаңадан құрылған Атом энергетикасы жөніндегі агенттік толық жауапты.
— Радиоактивті қалдықтар мәселесі Экологиялық кодекспен реттелмейді, бұл бағытты реттейтін жеке заң бар. Атом энергетикасы жөніндегі агенттігі құрылуына байланысты, олар құрылыс пен пайдаланудан бастап бүкіл цикл үшін толық жауапты, сондықтан аталған мәселені агенттік реттейді, — деді вице-министр.
Экологиялық талаптар назардан тыс қалмайды
Соған қарамастан, министрдің орынбасары АЭС жобаларына қатысты экологиялық талаптар ескерілетінін айтты.
— Радиоактивті қалдықтармен жұмыс істеу мәселесі кез келген жағдайда мемлекеттік экологиялық сараптамадан өтеді және ұлттық заңнама мен МАГАТЭ (IAEA) талаптары толық есепке алынады. Өйткені атом энергетикасына қатысты кез келген мәселе осы халықаралық және ұлттық талаптармен тығыз байланысты, — деп атап өтті ол.
АЭС — ұлттық бақылауда
Қазақстанда салынатын алғашқы атом электр стансасы толықтай ұлттық бақылауда болады. Бұл жобаның қауіпсіздігі мен тиімділігіне ел үкіметі тікелей жауапты.
Сонымен қатар вице-министр АЭС-тен алынатын электр энергиясының құны дәстүрлі ЖЭО (жылу электр орталықтары) және ЖЭС (жылу электр стансалары) өндірген энергиядан қымбат болатынын растады.
