Микроқаржы ұйымдарының қаржылық тұрақтылығын күшейтуге назар аударылып отыр, деп хабарлайды kaskelen.kz ҚР Қаржы нарығын реттеу және дамыту агенттігі төрағасының орынбасары Олжас Қизатовтың мәлімдемесіне сілтема жасап.
Бүгін Орталық коммуникациялар қызметіндегі баспасөз мәслихатында тілшілер микроқаржы ұйымдарын (МҚҰ) жабу мүмкіндігіне қатысты сұрақ қойды.
«Қаржы нарығын реттеуші агенттік ретінде әрбір салада қаржы нарығын дамыту мақсатын қойып отырмыз. Бізде жалпы микроқаржы ұйымдарын, ломбардтарды, коллекторлық агенттіктерді қосқан кезде 1,5 мың ұйым бар. Олар бүкіл Қазақстан өңірлерінде таралған. Микроқаржы ұйымдарын не үшін дамытуымыз керек? Мәселен, 21 банк бар және олар көбіне үлкен қалаларда, облыс орталықтарында орналасқан. Шалғайдағы елді мекендерде микроқаржы ұйымдарының институттары дамуы керек. Сол өңірлердің тұрғындарына МҚҰ-ның кредит ресурстарын қолжетімді ету маңызды жұмысымыздың бірі саналады», – деді О. Қизатов.
Сондай-ақ ол агенттік микроқаржы ұйымдарының қаржылық тұрақтылығын күшейтуге назар аударып отырғанын айтты.
«Елімізде 1,5 мың микроқаржы ұйымы тағы да көбейе қоймас. Солардың қаржылық жағдайын күшейтуіміз керек. Яғни капиталдарын көбейтіп, қаржылық жағдайын күшейтеміз», – деді агенттік өкілі.
Бұдан бұрын хабарланғандай, микрокредиттердің ең көп көлемі қай облыстарда берілгені анықталды.
