Қазақстан мектептерінде соңғы қоңырау сыңғырлап, түлектер мектеппен қоштасуға дайындалып жатыр. Кеше ғана партада отырған бозбала мен бойжеткен бүгін сән салоны мен мейрамхана іздеп әлек. Ал ата-аналар баласының арманы орындалуы үшін біраз шығынға батуға дайын. Kazinform агенттігінің мәліметінше, мектеп бітіру кешіне кететін шығын әр өңірде әртүрлі. Бірақ бір нәрсе анық – бұл қуаныш арзанға түспейді.
Мейрамхана – басты шығын көзі
Бітіру кешіндегі ең үлкен шығын – мейрамханаға төленетін ақша. Екі адамға арналған кешкі ас, яғни түлек пен ата-анасының бірі үшін орта есеппен 40 000-нан 150 000 теңгеге дейін қажет. Бұл сомаға банкет мәзірі, асаба, видеограф, кей жағдайда лимузин мен LED-экранды жалға алу да кіреді.
Ең арзан банкеттер Петропавл, Түркістан және Тараз қалаларында өтеді – екі адамға шамамен 40 000–45 000 теңге. Ақтөбе, Орал, Павлодар, Көкшетау, Қонаев, Талдықорған мен Жезқазғанда бұл сома 50 000–60 000 теңгеге дейін көтеріледі. Ал ірі қалаларда – Астана, Алматы, Ақтау, Қарағанды, Қостанай, Шымкент және Қызылордада – банкеттің құны 70 000–100 000 теңге аралығында. Мейрамхана қызметі ең қымбат Атырауда – екі адамға 150 000 теңге.
Фотоальбом – естелік пе, сән бе?
Түлектер үшін тағы бір маңызды нәрсе – фотоальбом. Фотостудиялар әртүрлі форматтағы естелік альбомдарды ұсынады: 4-5 беттен тұратын қарапайым нұсқадан бастап, 100 бетке дейінгі сәнді фотокітаптар да бар.
Орташа есеппен, фотоальбом 10 000 теңге тұрады. Алайда баға өңірге қарай өзгеріп тұрады. Ең арзан альбомдар Петропавл, Семей мен Өскеменде – 8000–8500 теңге. Ал Ақтауда фотоестеліктің бағасы аспандап тұр – 30 000 теңге. Қалған өңірлерде баға 9000–20 000 теңге аралығында.
Киім – сән мен салтанаттың көрінісі
Бітіруші қыздардың кешке дайындығы ерекше. Кешкі көйлек – бұл тек киім емес, өз-өзіне деген сенімділіктің, мейрамның сәнінің көрінісі. Салтанатты көйлекті жалға алу – 10 000–150 000 теңге шамасында. Ал сатып алатындар үшін баға бірнеше есе жоғары болуы мүмкін.
Ұл балаларға арналған костюм-шалбар орта есеппен 50 000 теңге. Сонымен қатар, қыздардың шаш үлгісі мен макияжына орта есеппен тағы 20 000 теңге жұмсалады.
Қорытынды
Мектеп бітіру кеші – әрбір отбасы үшін маңызды күн. Дегенмен, соңғы жылдары бұл шараның шектен тыс сәнге, шығынға айналып кеткені байқалады. Ата-аналар мен мектеп әкімшілігі арасындағы тепе-теңдік пен келісім маңызды. Себебі баланың есінде қалатын кеш – көңілден шыққан қуаныш пен мейірімді орта, ал баға – кейін ұмытылатын сандар ғана.
