ҚР Ауыл шаруашылығы министрлігі еліміздегі жинақталған еттің қорына қатысты түсінік берді, деп хабарлайды kaskelen.kz порталы.
«Ұлттық статистика бюросының мәліметіне қарағанда, жыл басынан 353 мың тонна ет өндірілді. Оның ішінде сиыр еті – 139,1 мың тоннаға, қой еті – 37,5 мың тоннаға, жылқы еті – 40 мың тоннаға, құс еті 119 мың тоннаға жетті. Бұл көрсеткіш былтырғы сәйкес кезеңмен салыстырғанда 1 пайызға артық», – делінген министрліктің Kazinform агенттігіне берген жауабында.
Әкімдіктердің мәліметі бойынша тұрақтандыру қорларындағы ет өнімдерінің қоры (10 мамырдағы жағдай бойынша) 288,2 тоннаны, сауда объектілерінде (айналым схемасы аясында) 4,4 мың тоннаны, кәсіпорындарда 312 мың тоннаны құрады. Сонымен қатар, министрлік бұл көрсеткіш белгілі бір уақыт кезеңіндегі резервтер екенін, ет көлемі күнделікті сатылып, толықтырылып отыратынын мәлім етті.
«Бұдан бөлек, тауарларға арналған шикізат қоры, сондай-ақ ет-сүт өнімдерін өндіруге қажет мал басы да жеткілікті. Азық-түлік өндірісі тоқтамайды, сондықтан қор үнемі толықтырылып отырады. Министрлік өңірлердегі әлеуметтік маңызы бар азық-түлік тауарларының қорына тұрақты мониторинг жүргізеді», – деп аталып өткен ведомство ақпаратында.
