Еуростаттың соңғы мәліметтеріне сәйкес, Еуропа тұрғындарының білім деңгейі бұрынғыдан жоғарылаған: барлық мемлекеттерде әйелдер ер адамдардан озып тұр, деп хабарлайды kaskelen.kz тілшісі Euronews порталына сілтеме жасап.
2014 жылы Еуроодаққа мүше мемлекеттердегі 25–74 жас аралығындағы халықтың небәрі 26%-ы жоғары оқу орнын тәмамдаса, 2024 жылы бұл үлес 33,5%-ға жеткен.
Жоғары оқу орнын аяқтаған 25–34 жастағы жастар үлесі бойынша алдыңғы қатарда тұрған мемлекеттер:
-
Ирландия
-
Люксембург
-
Кипр
Аталған елдерде жастардың 60%-дан астамы жоғары білімге ие.
Ал Румыния керісінше — соңғы орында қалып отыр: бұл елде 25–34 жас аралығындағы жастардың 30%-дан азы жоғары оқу орнын бітірген, бұл — ЕО елдері ішіндегі ең төменгі көрсеткіш.
Ұрпақтар арасындағы айырмашылық
Мәліметтер әр жастағы топтардың білімге деген көзқарасында елеулі өзгерістер барын байқатады:
-
25–54 жас аралығындағы азаматтардың 82,7%-ы кем дегенде орта білім алған;
-
Ал 55–74 жас арасындағы аға буын өкілдерінің ішінде бұл көрсеткіш – 70,4%.
Жастардың жоғары білім алу мүмкіндігі үлкендерге қарағанда екі есе көп:
-
Жастар арасында бұл үлес – 39,8%,
-
Егде жастағыларда – 23,9%.
Кәсіби білімге бетбұрыс
Кәсіби білім алу көрсеткіші елге және жас шамасына байланысты айтарлықтай ерекшеленеді:
-
Люксембургте орта білім алғандардың 96%-дан астамы кәсіптік бағытты таңдаған (жас пен аға буын арасында).
-
Португалияда үлкендердің тек 13,5%-ы ғана кәсіби білім алған, ал жастар арасында бұл көрсеткіш – 37,2%.
Грекия, Ирландия, Испания және Кипрде де осындай кәсіптік білімге бет бұру үрдісі байқалады. Бұл — Еуропада нақты практикалық дағдыларға бағытталған оқыту жүйесіне көшу үдерісін айқындайды.
Әйелдердің білім деңгейі ерлерден жоғары
Бүкіл Еуропа бойынша әйелдер ер адамдарға қарағанда жиі әрі ұзақ оқиды.
-
2024 жылы 25–34 жастағы әйелдердің 49,9%-ы жоғары оқу орнын бітірген;
-
Ерлер арасында бұл көрсеткіш – 38,7%.
Соңғы онжылдықта бұл айырмашылық 1%-ға арта түскен.
Орта білім деңгейінде де айырмашылық бар:
-
20–24 жас аралығындағы әйелдердің 86,8%-ы,
-
Ерлердің 81,8%-ы орта білімге ие.
Тек Румынияда ер адамдар әйелдерден сәл алда тұр.
Бұған дейін Франция сарапшысы Еуропаның алдында тұрған негізгі қауіп туралы пікір білдірген болатын.
