Елімізде жаңа айыппұл күшіне енді, деп хабарлайды kaskelen.kz порталы. Бұл туралы cауда және интеграция министрлігі мәлімдеді.
13 наурызда Қазақстанда әкімшілік құқық бұзушылықтар туралы кодекске әлеуметтік маңызы бар азық-түлік тауарларының сауда үстемесін асыра пайдалану мәселелері бойынша өзгерістер енгізілді.
“Негізгі өзгеріс алғашқы құқық бұзушылық үшін қолданылатын санкцияның ауысуына қатысты: ескерту орнына енді бірден айыппұл салынатын болады. Бұл дегеніміз, әлеуметтік маңызы бар азық-түлік тауарларының үстемесі 15 пайыздан асқан жағдайда, кәсіпкерлер бұрынғыдай ескерту алмай, бірден айыппұл арқалайтын болады”, — делінген сауда министрлігінің хабарламасында.
Бұрын алғашқы құқық бұзушылық кезінде кәсіпкер тек ескерту алатын, ал айыппұл тек қайталанған құқық бұзушылық үшін қолданылатын. 13 наурыздан бастап енгізілген өзгерістерге сәйкес, алғашқы құқық бұзушылық үшін де жауапкершілік қатаңдатылды.
- жеке кәсіпкерлер мен шағын бизнес үшін – 5 АЕК (2025 жылы 19 660 теңге);
- орта бизнес үшін – 35 АЕК (2025 жылы 137 620 теңге);
- ірі сауда желілері үшін – 150 АЕК (2025 жылы 589 800 теңге).
Бір жыл ішінде қайталанған құқық бұзушылықтар үшін айыппұлдар екі есеге артады.
Сауда министрлігінің мәліметі бойынша, енгізілген өзгеріс бірінші қажеттілік өнімдерінің баға тұрақтылығын қамтамасыз етуге және негізсіз бағаның өсу тәуекелдерін азайтуға бағытталған.
Министрлік сауда орындарына бақылауды күшейтетінін мәлімдеді.
“Өткен аптада нан, макарон, күріш, күнбағыс майы, айран және тұз сияқты тауарлар бойынша баға тұрақты болды. Ал сиыр еті, қырыққабат және картоп сияқты тауарларда аздаған баға өсуі байқалды. Көкөніс тобындағы бағаның өсуі маусымдық факторға және коммуналдық қызметтер тарифтерінің қымбаттауына, сондай-ақ сақтау шығындарымен байланысты”, — делінген сауда министрлігінің хабарламасында.
Еске сала кетейік, бұған дейін Қазақстанда 5 сәуірден бастап ереже бұзған мопед жүргізушілеріне айыппұл салу басталған еді.
