Мәдениет және ақпарат министрлігі мемлекеттік қызметтегі басшылық лауазымдардағы әйелдер туралы ақпарат жариялады, деп хабарлайды kaskelen.kz порталы.
Министрлік мәліметі бойынша, Қазақстанда мемлекеттік қызметтегі басшылық лауазымдардың 39%-ын әйелдер атқарады.
Қазіргі таңда парламентте 28 әйел депутат бар, бұл жалпы депутаттар санының 18,9%-ы, ал мәслихаттардағы әйелдердің үлесі – 22,7%-ға (3 415 депутаттың 774-і) жеткен.
“Мемлекеттің 21 министрлігінде, денсаулық сақтау, еңбек және халықты әлеуметтік қорғау, мәдениет және ақпарат министрліктерінде 3 әйел министр, 8 вице-министр, 3 аппарат басшысы бар. Сонымен қатар, Қазақстан Республикасы Президентіне тікелей бағынышты және есеп беретін 14 мемлекеттік органда 6 әйел басшылық қызмет атқарады. Ел бойынша судья әйелдердің жалпы саны – 1 248 адам (53%)”, – делінген министрлік хабарламасында.
2025 жылғы 1 қаңтардағы жағдай бойынша, мемлекеттік қызметтегі әйелдердің үлесі 55,8%-ға (84 482 мемлекеттік қызметкердің 47 158-і әйелдер) жеткен. Басшылық лауазымдардағы әйелдердің жалпы үлесі – 39,1% (23 947 басшының 9 363-і).
Ал шағын және орта бизнес иелерінің құрылымында әйел кәсіпкерлердің үлесі 48%-ға жетті.
