2025 жылдың 5 сәуірінен бастап мопедтер ресми түрде механикалық көліктерге теңестіріледі, деп хабарлайды kaskelen.kz тілшісі.
5 сәуірден бастап мопеттерді тіркеу үшін бірнеше құжат пен рәсімдер қажет:
- Полицияда тіркелу;
- А1, А немесе В санатындағы жүргізуші куәлігі;
- Техникалық тексеру;
- Азаматтық жауапкершілікті сақтандырудан өту қажет болады.
Тіркелу үшін тұрғылықты жері бойынша арнайы ХҚКО-ға келесі құжаттармен жүгіну керек:
- Жеке куәлік (электронды түрде болуы мүмкін);
- Мопедтің техникалық құжаты немесе сипаттамалары.
Содан кейін өтінішті толтырып, мопедті тексерістен өткізіп, қажетті мемлекеттік баждарды төлеу қажет.
“5 сәуірден бастап тіркелмеген мопедтерді пайдалануға, жүргізуші куәлігінсіз жүруге тыйым салынады. Бұзушылықтарды болдырмау үшін мопедті алдын ала тіркеп, жүргізуші куәлігін алуды ұсынамыз”, – деді ІІМ әкімшілік полиция комитетінің ерекше тапсырмалар жөніндегі аға инспекторы Арай Төлегенқызы.
