Қазақстанда былтыр фармацевтикалық нарықтың көлемі 1,2 трлн теңгені құраған. Ал оның 84 пайызы шетелдік өнім, деп хабарлайды kaskelen.kz порталы.
Қазақстандағы фармацевтикалық нарықтың 84 пайызы шетелдік өнімдерге тиесілі. Бұл туралы ҚР Жоғары аудиторлық палатасының төрағасы Әлихан Смайылов Мәжілістің жалпы отырысында мәлімдеді.
— 2024-2025 жылдары жүргізілген екі аудит нәтижесінде дәрі-дәрмекпен қамтамасыз ету жүйесінде бірқатар кемшілік анықталды. Ең бастысы — отандық фармацевтиканың нашар дамуы. 2024 жылы еліміздегі фармацевтикалық нарықтың көлемі 1,2 трлн теңгені құрады, оның 84 пайызы — шетелдік өнімдер, — деді Смайылов.
Ғылымға бөлінген қаржы мен үйлестірудің әлсіздігі
Сонымен қатар, Жоғары аудиторлық палата басшысы 2022–2024 жылдар аралығында медицина ғылымына 58 млрд теңге бөлінгенін атап өтті. Алайда, қаржы бөлінгенімен, зерттеу жұмыстарының саны аз және олар үйлестірілмеген.
— Денсаулық сақтау министрлігі мен Ғылым және жоғары білім министрлігі тарапынан іске асырылатын зерттеулер бір-бірімен байланыспаған. Бұл нақты қажеттіліктерге негізделген ғылыми басымдықтарды айқындауға мүмкіндік бермейді, — деді ол.
Мәселе қайда жатыр?
Смайыловтың айтуынша, отандық дәрі-дәрмек өндірісінің деңгейін арттыру, ғылым мен денсаулық сақтау саласының интеграциясын күшейту, сондай-ақ салалық ғылыми зерттеулердің тиімділігін арттыру — өзекті мәселелердің бірі болып отыр.
