Еңбек және халықты әлеуметтік қорғау министрлігінде жұмыс берушілердің өз қызметкерлеріне қанша қарыз екендігі айтылды, деп хабарлайды kaskelen.kz.
“1 шілдедегі жағдай бойынша Мемлекеттік еңбек инспекторлары республиканың 190 кәсіпорнында 2,9 миллиард теңгеден астам сомаға 11,2 мың қызметкердің алдындағы жалақы бойынша берешекті анықтады. Сонымен қатар, түрлі ұйымдарда жүргізілген тексерулер барысында 5,6 мыңға жуық еңбек құқықтарының бұзылуы анықталды“, – деді Еңбек министрлігі.
Жалақы бойынша берешегі анықталған кәсіпорындардың басшыларына орындауға міндетті 182 ұйғарым берілді және 26,7 миллион теңгеден астам сомаға айыппұл салынды.
Қабылданған шаралардың, соның ішінде жалақы бойынша берешекті өтеудің қатаң кестелері мен мерзімдерін белгілеудің нәтижесінде 9,5 мыңнан астам қызметкердің құқықтары қорғалды. Оларға 2,2 миллиард теңге төленді.
Сондай-ақ, 1 шілдедегі мәліметтер бойынша, Мемлекеттік еңбек инспекторлары 3 549 тексеру жүргізді, оның барысында 5 607 бұзушылық анықталды, оның ішінде:
- еңбек саласында – 4 067;
- еңбек қауіпсіздігі және еңбекті қорғау бойынша–1 485;
- халықты жұмыспен қамту бойынша – 55.
Жұмыс берушілерге 2 147 ұйғарым беріліп, 2 628 әкімшілік айыппұл 276,3 миллион теңге сомасына салынды.
