Павлодар облысында 7 жасар қызын өлтірді деген күдікпен анасы ұсталды.
Бұл туралы ҚР ІІМ хабарлады. 2015 жылы туған Давыдова Милананың белгісіз жоғалып кетуінің мән-жайлары мен себептері анықталды.
Милана Давыдованың мәйіті табылды. Кәмелетке толмаған баланы өлтірді деген күдікпен полиция қызметкерлері қылмыстың іздерін жасырған анасы мен танысын ұстады. Ұсталғандар қылмысын мойындады.
Кісі өлтіру фактісі бойынша ҚР ҚК 99-бабының 3-бөлігі бойынша сотқа дейінгі тергеу басталды. Қазіргі уақытта тергеу әрекеттері жүргізіліп жатыр.
Кейбір дереккөздер кішкентай қыз анасын көңілдесімен көріп қойып, әкесіне айтамын деп қорқытқан, әйел сол себепті қызды өзі өлтіріп, қасындағы еркек мәйітті апарып қоқысқа көмген деп жазуда.
Ал Милананың әкесі өз сөзінде өзі сыртта мал бағатынын, қыз жоғалды деген хабар келгенде қорқып дереу жеткенін, әйелі бұлай жасайды деп ойламағанын айтуда.
