Вице-премьер – ұлттық экономика министрі Серік Жұманғарин елде қосылған құн салығы көтерілгендіктен, жалақы, зейнетақы мен жәрдемақы да өсетінін айтты, деп хабарлайды kaskelen.kz порталы.
Серік Жұманғариннің айтуынша, осы арқылы азаматтардың төлем қабілетін сақтап қалу жоспарланып отыр.
“Егер реформа жүзеге асырылса, сөзсіз, атаулы әлеуметтік көмек өседі. Көмек алатын барлық азаматты қамтимыз. Барлық бюджет қызметкерлерінің жалақысы мен зейнетақысын индекстейміз. Басты идея реформа табысы төмен азаматтарға әсер етпеуі керек. Мұндай мақсат үнемі біздің алдымызда тұрады. Сондықтан бұған байыппен қараймыз”, – деді Жұманғарин.
Еске сала кетейік, бұған дейін Серік Жұманғарин қосылған құн салығы қанша пайызға дейін өсетіні әлі белгіленбегенін айтқан еді.
“Әзірге нақты қанша пайыз болатынын нақтыламадық. Бізде жетекші экономистер, елдегі салық мамандарынан тұратын кеңесшілер бар. Олар стресс-тест пен түрлі есептеулер жүргізеді. Бүгінде Ұлттық банктің макрофинанстық модельдері базасында бірнеше есептеу жүргізілді. Әлі есептеулер жүріп жатыр. Сондықтан үкімет нақты шешім қабылдады және ставка белгіленді деп айтудың қажеті жоқ”, – дейді Серік Жұманғарин.
