Халық әншісі Өмірқұл Айниязов отбасында орын алған оқыс оқиға жайлы айтып берді. Өнер иесінің ұлы дәл үйлену тойы алдында жантүршігерлік жол апатына түскен. Нәтижесінде жол-көлік оқиғасында бір жолаушы қайтыс болды, деп хабарлайды kaskelen.kz порталы.
Өмірқұл Айниязов “Ұйқым келмейді” бағдарламасына қонақ болып ұлының басына түскен сынақ жайлы айтты. Оның айтуынша, перзенті жол апатының салдарынан екі тісі мен иығын сындырып алған.
“Тойдың алдында балам жол апатына ұшырады. Шошытатын жағдай болды. Ауылда бір қарындасымыздың тойы болған. Мен басқа жақпен бардым. Нұртуған өзі “таксимен шығамын” деді. Неге ұшаққа мінбегенін білмеймін. Алматыдан Қызылордаға кешкі 9-10-дарда шыққан. Таңғы 8-8:30-да жүргізуші ұйықтап кетіп, тұрған “Газель” көлігіне соқтығысқан. Баламның екі тісі, иығы сынды. Артта отырған қыз бала қайтыс болып кетті. Иманды болсын.
Балама “сен де соның орнында болуың немесе мүгедек болып қалуың мүмкін еді, сондықтан Аллаға шүкір айт” дедім. Қалғандары аман болды. Бұл да бір тойдың алдындағы сынақ болған шығар деп ойлаймын. Қазір жақсы, бірақ әлі тісін салмадық. Оған уақыт, күтім керек екен”, – деді әнші.
