Жұмыскер еңбек шартында көзделмеген функцияларды орындаудан бас тартуға құқылы. Бұл туралы Мәжіліс депутаттарының сауалына Премьер-министрдің орынбасары Ермек Көшербаевтың жауабында айтылған, деп хабарлайды kaskelen.kz порталы.
— Еңбек кодексіне сәйкес, жұмыскер өз міндеттерін келісімдерге, еңбек және ұжымдық шарттарға, жұмыс берушінің актілеріне сәйкес орындауға міндетті. Ағымдағы жөндеу жұмыстары жұмыскердің еңбек міндеттеріне кіретін болса (тараптардың еңбек шарты мен келісімде өзгеше белгіленбесе), қосымша төлемдер көзделмейді. Жұмыскер өзінің еңбек шартында көзделмеген функцияларды орындауға тартылса, ол оларды орындаудан бас тартуға құқылы. Жұмыс берушінің жұмыскердің келісімінсіз еңбек міндеттерін біржақты өзгертуге немесе кеңейтуге құқығы жоқ, — деді вице-премьер.
Оның сөзінше, бір ұйым аясында қосымша жұмыс қосымша ақы төлеуге жатады.
— Мұндай тапсырманың нұсқаларына мыналар жатады — лауазымдарды қоса атқару (басқа бос лауазым бойынша қосымша жұмысты орындау); қызмет көрсету аймақтарын кеңейту (жұмыс күні (ауысым) шегінде жұмыс көлемін ұлғайту); уақытша болмаған қызметкердің міндеттерін орындау (басқа және ұқсас лауазым бойынша функцияларды орындау). Осылайша, егер техникалық жұмыскер өзінің еңбек міндеттерінде көзделмеген ағымдағы жөндеу жұмыстарына тартылса, ол қосымша ақы алуға құқылы. Жұмыс беруші қосымша ақы төлеуден заңсыз бас тартқан жағдайда, жұмыскер мемлекеттік еңбек инспекциясына жүгінуге құқылы, — деді Ермек Көшербаев.
