Мәжілістің жалпы отырысында депутат Нартай Сәрсенғалиев жеке меншік мектептердің жаппай жабылатыны туралы қоғамда тараған ақпаратқа алаңдаушылық білдірді, деп хабарлайды kaskelen.kz порталы.
Оның айтуынша, елімізде 300 мыңнан астам оқушы білім алып жатқан 800-ге жуық жекеменшік мектептің жағдайы белгісіз күйге түскен.
«Елімізде 300 мыңнан астам оқу білім алатын 800 жеке меншік мектеп бар. Оларға мемлекеттік тапсырыс тоқтатылады екен деп жатыр. Ертең бірқатары жабыламыз деген хабарламасын айтып жатыр. Оларды қаржыландыру жергілікті бюджетке түсті. Ертең олардың бәрі жабылып қалса, 300 мың оқушыны қайда жібереміз?» — деп сұрады депутат.
Аталған сауалға жауап берген Оқу-ағарту министрі Ғани Бейсембаев нақты түсініктеме берді. Оның сөзінше, тек білім беру талаптарына сай келмейтін, жертөле мен бейімделмеген ғимараттарда орналасқан мектептер ғана жабылуы мүмкін.
«Бізді сол жеке меншік мектепте оқып жатқан 300 мың баланың сапалы білім алуы министрлікті өте қатты алаңдатады. Біз Жоғары аудиторлық палатаның тексеруі нәтижесінде де жеке меншік мектептердегі білімнің сапасына үлкен сұрақтар туындағанын көріп отырмыз», — деді Ғани Бейсембаев.
Министр нақты критерийлерге сай жұмыс істеп, сапалы білім ұсынып отырған жекеменшік мектептердің еш алаңдамауына болатынын атап өтті.
«Рас, егер жеке меншік мектептер жабылатын болса, мына жертөлелерде, мектепке тиесілі емес ғимараттарда орналасуы бірінші кезекте себеп болады. Сондай-ақ, өте сапалы білім көрсетіп отырған жеке меншік мектептеріміз бар. Оларға ешқандай қауіп төніп отырған жоқ. Мұны нақты айта аламын», — деді министр.
Бұл мәселе бұған дейін Үкімет деңгейінде де қаралған болатын. Қоғам арасында тараған түрлі қауесеттерге байланысты ата-аналар мен мектеп иелері арасында алаңдаушылық артқан.
