Қазақстанда «Жер учаскесін жалға алу мерзімін ұзарту» мемлекеттік қызметіне бірқатар өзгерістер енгізілді. Бұл жаңашылдық азаматтардың құқықтарын кеңейтіп, қызмет көрсету тәртібін жеңілдетуге бағытталған. Аталған ақпаратты kaskelen.kz порталы Қостанай облыстық мемлекеттік қызмет істері департаментіне сілтеме жасап хабарлады.
Бұрын қалай еді?
Бұған дейін жалға алу мерзімін тек ауыл шаруашылығы мақсатындағы немесе құрылысқа арналған жер учаскелері үшін ұзартуға рұқсат етілетін. Енді бұл мүмкіндік ғимараттар, құрылыстар немесе басқа да нысандарды орналастыру мен қызмет көрсету мақсатындағы жер телімдеріне де қолданылатын болды.
Өзгерістер қалай жүзеге асты?
Жаңартулар Қостанай облысы мемлекеттік қызмет істері департаментінің ұсынысы негізінде әзірленіп, республикалық деңгейде мақұлданған.
— Бұрын бұл қызмет тек аудандық және қалалық әкімдіктер арқылы көрсетілетін. Енді өтінімдерді ауыл, ауылдық округтер мен елді мекендер деңгейіндегі әкімдіктер де қабылдай алады, — дейді департамент өкілдері.
Тағы бір маңызды жаңалық — өтінімді қарау мерзімі бірыңғайланды.
Бұған дейін Жер кодексі мен ережелерде көрсетілген мерзімдерде алшақтық болған: бір жерде 8, екінші жерде 13 жұмыс күні деп жазылған. Енді бұл барлық деңгейде 8 жұмыс күнімен шектеліп, бірыңғай стандартқа келтірілді.
