2025 жылғы 1 мамырдағы жағдай бойынша Қазақстанда 43,4 мың отбасы атаулы әлеуметтік көмек (АӘК) алып отыр. Бұл — 232,5 мың адамды қамтып, жалпы 10,4 млрд теңге көлемінде төлем жүргізілген. Еңбек және халықты әлеуметтік қорғау министрлігінің хабарлауынша, 2025 жылға АӘК төлеуге 132,9 млрд теңге көлемінде бюджет қарастырылған, деп хабарлайды kaskelen.kz порталы.
АӘК – тек ақшалай қолдау емес. Оның негізгі мақсаты — отбасын қиын өмірлік жағдайдан шығару. Бұл үшін еңбекке қабілетті азаматтарды жұмысқа орналастыру, кәсіп ашуға грант беру және біліктілікті арттыру шаралары қарастырылған.
«АӘК-нің негізгі мақсаты — ақшалай төлем түрінде қолдауды жүзеге асыру және отбасының еңбекке қабілетті мүшелерін жұмыспен қамтуға жәрдемдесудің белсенді шараларына тарту арқылы отбасын қиын өмірлік жағдайдан шығару», — делінген министрлік хабарламасында.
АӘК келесі бағыттарды қамтиды:
-
Табысы кедейлік шегінен аспайтын азаматтарға тоқсан сайын әлеуметтік көмек тағайындау;
-
Табысы аз отбасылардағы 1 жас пен 6 жас аралығындағы әр балаға 1,5 АЕК мөлшерінде ай сайынғы қосымша төлем беру. Мәселен, биылғы 1 мамырға дейін 74,4 мың балаға 1,4 млрд теңге көлемінде төлем берілген;
-
Жұмысқа орналастыру, кәсіп бастауға грант беру, оқыту және басқа да шаралар арқылы отбасыларды жұмыспен қамтуға жәрдемдесу.
АӘК тағайындауға өтінішті азаматтар тұрғылықты жері бойынша мансап орталықтарына, ауыл әкімдеріне немесе egov.kz электронды үкімет порталы арқылы бере алады.
«Қазіргі уақытта қазақстандықтар АӘК тағайындауға өтінішті тұрғылықты жері бойынша мансап орталығында, ауыл округінің әкіміне сондай-ақ электрондық үкімет порталы (egov.kz) арқылы бере алады», — деп нақтылайды министрлік.
Айта кетейік, 2025 жылғы 1 қаңтардан бастап елімізде кедейлік шегі өңірлік медиандық табыстың 35% деңгейінде белгіленген. Бұл шек өңірлік ең төмен күнкөріс деңгейінің 70%-ынан төмен болмауы тиіс.
