Редакциямызға Қаскелең қаласы тұрғындарынан келіп түсетін шағымдар қатары толассыз. Шешімі табылмай жауыр болған сондай мәселенің бірі – “Қарлығаш” тұрғын үй кешеніндегі су мәселесі. Тұрғындар ыстық су қысымының төмен екенін, кейде тіпті ақпайтынын айтып, шағымдануда, деп жазады kaskelen.kz тілшісі.
Жылдың қай мезгілі болмасын “Қарлығаш” тұрғын үй кешенінің тұрғындары күндізгі уақытта судың қысымы өте төмен, кейде тіпті жоқтың қасы. Сол себепті тұрғындар суды түнгі мезгілде жинауға мəжбүр.
“Ыстық судың қысымы жоқ. Тіпті ақпайды да. Балалаларды шомылдыру түгілі, қолымызды жуа алмаймыз. Шелек пен тазикке ыстық су дайындап, соны ваннаға тасып, балалаларды солай шомылдырамыз”, – деп жазды оқырман.
Айтуынша, суды газға ысытып барып қолданатын көрінеді. Себебі сорғалап аққан сумен шелекті толтырамын дегенше суып кететін көрінеді.
“Қарлығашта басты проблема – су! Судың сапасы өте нашар , ішуге мүлде жарамайды, ішпек түгілі жуынуға, қолдануға зар болып жатыр. Ай сайын теплообменник қаққа толып бітеліп қалады. Фильтр қоймай проблемалар шешілмейді”, – деп жазды тұрғындардың бірі.
Ендібір желі қолданушысы: “Қаскелен каласы үлкен тұрғын үй кешенлеріне дайын емес. Инфрақұрылым шыдамайды”, “7 қабат емес, 5 қабатты үйлерде де 3-ші қабаттан жоғары судың қысымы болмайды”, – деп жазды.
