Қазақстандықтардың азық-түлік тауарларына жұмсаған шығыны 6,7 пайызға немесе жан басына шаққанда 131,3 мың теңгеге дейін өсті, деп хабарлайды kaskelen.kz порталы.
Қазақстандықтардың шығынының басым бөлігі азық-түлік өнімдерін сатып алуға кетеді. Оған қоса, адамдардың азық-түлікке жұмсайтын сомасы үнемі өсіп келеді.
Finprom порталының мәліметіне сәйкес, биылғы жылдың бірінші тоқсанында әрбір орташа қазақстандық азық-түлік пен алкогольсіз сусындарға 131,3 мың теңге жұмсаған, бұл бір жыл бұрынғы көрсеткіштен 6,7 пайызға артық.
Сізге ұнауы мүмкін
Салыстыра кетсек, өткен жылдың 1 тоқсанында шығын көлемі жан басына шаққанда 123,1 мың теңге болса, 2022 жылы 101,6 мың теңге болса, 2019 жылы небәрі 72,3 мың теңгені құраған.
Айта кеткен жөн, әр өңірде тұратын қазақстандықтардың шығындарында айтарлықтай айырмашылық бар. Алматы тұрғындары ең көп ақша жұмсайды – жан басына шаққанда 181,5 мың теңге.
Одан кейінгі орында Шығыс Қазақстан және Маңғыстау облыстары – сәйкесінше 152,1 мың теңге және 146,7 мың теңге. Астанада бұл көрсеткіш 142,3 мың теңге, ал Шымкентте 115,6 мың теңге болды.
Азық-түлік пен сусынға ең аз ақшаны Қызылорда (жан басына шаққанда 104,6 мың теңге), Ақтөбе (106,4 мың теңге) және Түркістан (110,4 мың теңге) облыстарының тұрғындары жұмсаған.
Қазақстандықтар ақшасын қайда жұмсайды?
Соманың көп бөлігі екі негізгі азық-түлікке кетеді: ет, сондай-ақ нан және жарма өнімдеріне. Бірінші жағдайда шығыстар бір жылда 6,4 пайызға, жан басына шаққанда 43,3 мың теңгеге дейін, ал екіншісінде 8,6 пайызға, яғни 20,5 мың теңгеге дейін өсті.
Сонымен қатар сүт өнімдеріне (14,5 мың теңге, жылына 7,7 пайыз), жемістерге (11,6 мың теңге, плюс 12,2 пайыз) және көкөніске (8,9 мың теңге, плюс 0,7 пайыз) қомақты сомалар жұмсалады.
Қазақстандықтар бір тоқсанда қант, кондитерлік өнімдер мен тәттілерге 6,7 мың теңге, балық пен теңіз өнімдеріне 5,9 мың теңге, алкогольсіз сусындарға 5,8 мың теңге, жұмыртқаға – 3,3 мың теңге жұмсаған.
Шығындардың өсуіне Қазақстандағы инфляция маңызды рөл атқарды.
Еске сала кетейік, 2024 жылдың бірінші тоқсанының қорытындысы бойынша ол 9,3 пайыз болса, сол кездегі азық-түлік тауарлары бір жыл ішінде 7,5 пайызға қымбаттаған болатын.
