Алматы қалалық санитарлық-эпидемиологиялық бақылау департаменті басшысының орынбасары Әсел Қалықова метапневмовирус және оның негізгі белгілері туралы айтып берді, деп хабарлайды kaskelen.kz тілшісі.
– Осы эпидемиологиялық маусымда Алматыда метапневмовирус тіркелген жоқ. Вирустық инфекция штаммдарының айналымына эпидемиологиялық қадағалау қаладағы медициналық ұйымдармен және ауруханалармен бірлесіп жүргізіледі. Пациенттерден алынған барлық сынама Ұлттық сараптама орталығына жеткізіледі, онда сынақтар толық зерттеледі, – деді Қалықова.
Оның сөзінше, метапневмовирус – 60 жыл бұрын алғаш рет анықталған жедел респираторлық вирустық инфекция. Оны адамның метапневмовирусы деп те атайды. Қоздырғыш – құрамында рибонуклеин қышқылы (РНҚ) бар вирус.
Сонымен қатар ол адамдардың бәрі метапневмовирусқа бейім екенін жеткізді. Дені сау, иммунитеті түзу адамдарда метапневмовирус орташа және жеңіл түрде өтеді.
– Бөліп айтатын болсақ, 5 жасқа дейінгі балалар, егде адамдар мен созылмалы ауруы бар науқастар инфекцияны тез жұқтырып алуы мүмкін,– деді ол.
Эпидемиолог метапневмовирус балалар үшін қауіпті деген қауесетті жоққа шығарды.
– Кез келген вирустық инфекция сияқты асқынулар ауыр болуы мүмкін. Бұл пневмония, бронхит, отит. Метапневмовирусқа тән ерекше белгілері жоқ, – деп қосты Қалықова.
Аурудың алғашқы белгілері жөтел пайда болады, тамақтың аурады, температураның көтеріліп, мұрын бітеліп, су ағады. Кейде ауру симптомсыз болуы мүмкін.
– Қазір метапневмовирусқа қарсы арнайы вакцина жоқ. Дегенмен, тұмауға қарсы вакцинация респираторлық инфекциялардың жалпы жиілігін азайтуға көмектеседі,– деп атап өтті эпидемиолог.
Еске сала кетейік, елімізде метапневмовирусы таралып жатыр.
