ҚР Сауда және интеграция министрі Арман Шаққалиев Алматыға жұмыс сапары барысында қазақстандық ірі сауда желісінде болып, компания басшылығымен кездесті, деп хабарлайды kaskelen.kz порталы министрліктің баспасөз қызметіне сілтеме жасап.
Тараптар әлеуметтік маңызы бар азық-түлік тауарларының, оның ішінде картоп пен еттің қолжетімді бағасына ерекше назар аударды. Шаруалардың үлкен шығынына қарамастан, бағаның өсуін тежеу бойынша бірлескен іс-қимылдардың қажеттілігі атап өтілді.
Кездесу аясында ірі сауда желілеріндегі ассортименттің шамамен 60%-ы отандық тауарлар екендігі атап өтілді. Бұл Қазақстандық тауар өндірушілердің бөлшек саудасының жоғары деңгейін көрсетеді.
Министр отандық өндірушілердің сауда желілерінің сөрелеріне шығуын жеңілдету мақсатында жеткізілетін өнімдердің стандарттарын әзірлеуді ұсынды. Компания басшылығы жеткізушілерді қолдаудың қолданыстағы шаралары туралы баяндады және жергілікті өндірушілермен ынтымақтастықты кеңейтуге қызығушылық білдірді, сонымен бірге кәсіпкерлер қосымша қызметтерді өз еркімен ұсынатынын атап өтті.
Magnum басшысы Яков Фишман бөлшек сауда желілері жеткізушілерге өз тауарларын жылжыту үшін қандай қызметтер көрсететіні туралы айтты. Осы ынтымақтастықтың арқасында қазақстандық брендтер кеңінен танымал болды. Отандық өндірушілердің сатылымы өсуде, өндіріс дамуда, жаңа жұмыс орындары ашылуда. Сауда желісінің басшысы тауарларды жылжыту бойынша қызметтер міндетті емес екенін атап өтті. Әрбір серіктес өзіне қажет нәрсені өзі таңдай алады.
Кездесу қорытындысы бойынша Сауда министрлігінің қолдауымен жеткізушілер форумын өткізу туралы келісімге қол жеткізілді.
Платформа ірі сауда желілерімен жұмыс істеу шарттарын талқылауға және қазақстандықтардың қолжетімді бағамен жоғары сапалы отандық өнімге қолжетімділігін кеңейтуге мүмкіндік береді.
