Осы жылдың 1 қыркүйегінен бастап 1-4 сынып оқушылары тегін тамақпен қамтылады, деп хабарлайды kaskelen.kz порталы Оқу-ағарту министрлігінің баспасөз қызметіне сілтеме жасап.
“Тұрмысы төмен отбасылардан шыққан 1,5 миллионнан астам оқушыға, сондай-ақ әлеуметтік мәртебесіне қарамастан бастауыш сынып оқушыларына тегін тамақ беру жоспарланып отыр”, – деп жазылған хабарламада.
Елімізде тегін тамақпен қамту құны орташа есеппен 577 теңгені құрайды, ең жоғарғы баға Алматы қаласында – 800 теңге.
“Алдыңғы жылдары 1-4 сынып оқушыларының 56,6%-іне тегін тамақ берілді. Атап айтқанда, Астана, Алматы және Шымкент қалаларының, Павлодар, Батыс Қазақстан, Қарағанды, Ұлытау, Қызылорда және Атырау облыстарының оқушылары қамтылды”, – деп атап өтті Балалардың құқықтарын қорғау комитетінің басқарма басшысы Дана Мақтаева.
Оның айтуынша, қалған өңірлердің оқушыларын тегін тамақпен қамтамасыз ету бойынша жұмыстар жүргізілді, осылайша жаңа оқу жылынан бастап 100% көрсеткішке қол жеткізіледі.
